مبرووووك كسبت رحله الى شرم الشيخ

شرم الشيخ هى أجمل مكان ممكن تقضي فيه كم يوم حلو ، رومانسية و استرخاء و جو رائع و الأسعار اليومين دول اقتصادية ، و دي فرصة تاخد نفسك و تطير على هناك ، ولو كانت اول زيارة لك .. هقولك تروح فين و تعمل إيه



أولاً : الغوص

من أمتع الحاجات اللي ممكن تعملها في شرم الشيخ ومش هتنساها العمر كله هو الغوص .. خاصة و ان شرم الشيخ من اجمل الأماكن اللي ممكن نغطس فيها و تتمتع بجمال الشعب المرجانية ، و المبتدئين ليهم حظ كبير هناك لأن المدربين على درجة عالية من الأحترافية ... سعر الغوص معقول و غير مبالغ وبيدأ من 250 جنيهاً ..و ده حسب الوقت اللي هتقضيه تحت المياه .






ثانيـا : خليج نعمة

اجمل حاجة في خليج نعمة هو الأكل و السهر و الفرجة على الناس من مختلف جنسيات العالم .. وهناك هتلاقى أماكن جامدة جدا للسهر وهتتمتع باشهى المأكولات من مختلف بلاد العالم .. وكمان هتتفرج على التنورة في الشارع .



ثـالثـا : البيتش باجي

طبعا ركوب " البيتش باجي " متعة في حد ذاتها و طبعا الكثبان الرملية هناك هي اللي بتزيد من متعة التجربة .. وممكن فى الحالة دى إنك تسهر للصبح عشان تشوف شروق الشمس من ورا الجبال ، وانت سهران هناك أكيد هتتمتع بعشاء بدوي وسط رقصات فلكلورية جميلة .






رابعا : سانت كاترين

على قد ما تقدر اوعي تنسى تزور " دير سانت كاترين " و هو تقريبا بيبعد عن شرم حوالي ساعتين لكن هتستمتع جدا هناك و هتشعر براحة نفسية عجيبة .



خامسا : الف ليلة و ليلة

" ألف ليلة و ليلة " تقع في منطقة هضبة ام السيد و هو عبارة عن مجمع مغلق مليان مقاهي و مطاعم و محلات بتبيع الحاجات التذكارية .. و المجمع ده كمان بتكون فيه حفلات كتيرة جدا ، و طبعا طالما في شرم الشيخ اكيد هتزور البلدة القديمة وهى تشبه إلى حد ما الأسواق الموجودة في القاهرة, وهتلاقي فيها كل ما يلزم من دكاكين ومطاعم ومحلات تجارية.


سادسا : المحميات

طبعا أهمهم محمية رأس محمد و هي بتعتبرأول محمية طبيعية في مصر، وهي موجودة عند التقاء خليج السويس وخليج العقبة في الجزء الجنوبي من شبة جزيرة سيناء علي بعد 12 كيلو متراً من مدينة شرم الشيخ و70 كيلو متر من مدينة الطور ، و فيه رحلات بحرية كثيرة سهل جدا توصلك لغاية هناك .



اتنمى تكون الرحله عجبتكم الى اللقاء مع رحلة اخرى

بجد شرم الشيخ مكان جميل جدا فكرتني بأجمل الأيام هناك
انا رحتها شغل مستحملتش اشتغل فيها
بس رحتها سياحه طبعا استمتعت بيها ومشبعتش منها
وأتمني فى الآجازه القادمه اكون هناك
انا بصراحه مجربتش الدايفنج والسفاري بس انا بستمتع بالهدوء والمناظر الجميله
شكرا محمد على الرحله الجميله

شكررا احمد على الرحلة