يوميات عائلة رخمة

انتهى الأستاذ عبده من صلاة الصبح وجلس يسبح بحمد الله قليلا حتى تحضر زوجته الإفطارولكن زوجته فى هذا اليوم كانت تراقبه ولما رأته يسلم فى صلاته وبدأفى التسبيح ذهبت اليه وجلست أمامه على سجادة الصلاة وقالت
الزوجة بدلال : - حرما يابو محمد
محدثا نفسه : الكلام بالطريقة دى نايطمنش!! ثم رد عليها مبتسما
الزوج :- جمعا ياستى .. خير عايزة حاجة؟
ابتسمت الزوجة وقالت : - ياخويا الكازيون ع الابواب والمدارس قربت والعيال مجتاجين كسوة
الزوج لنفسه : انا قلت كدة من الاول
فرد عليها قائلا : - ربنا يسهل
الزوجة : - انت بتكلمنى كدة ليه باقولك العيال عايزة كسوة!
الزوج : - سمعت والمطلوب ايه دلوقت؟
الزوجة : - الف جنيه ياخويا ربنا يخلـ..........
قاطعها الزوج صائحا :- الف جنيه ليه هايدخلوا الجامعة دول لسة فى ابتدائى؟!
الزوجة :- وهم الألف جنيه دول حاجة بس قول يارب يقضوا!
الزوج :- كمان .. دانا كل اللى محوشه واحتكم عليه 600 جنيه عمى لمصاريف المدارس تيجى تقوليلى الف جنيه؟
الزوجة :- وكمان بتحوش من ورايا تبقى لازم شايفلك شوفة؟
الزوج :- ياختى اتنيلى اشوف ايه وانيل ايه؟
الزوجة :- امال عينك كانت هاتطلع على الست محاسن جارتنا وهى بتنشر الغسيل امبارح ليه؟
الزوج :- ياستى حرام عليكى اتقى الله دى الست صبحت عليا قمت رديت لها التحية
الزوجة :- امال بتحوش ليه؟
الزوج :- والله قلت قرشين ينفعوا فى مصاريف المدارس والا اى حاجة تحصل وياريتهم مقضيين طلاباتكم
الزوجة :- خلاص دور على شغل بعد الظهر
الزوج :- انتى بتخرفى .. دا الشباب ملطعين على القهاوى وعايزانى ألاقى شغل بعد الظهر!
الزوجة :- يعنى ايه هاتفضل قاعدلى كدة زى فضلة الكبة والبيت محتاج؟
ثم بدأت تبكى حظها قائلة : أه يانا يابختى يانا دانا قبل ماتجوزك من 11 سنة كان جايلى عريس تاجر نابوليا وانا اللى بخيبتى اتبترت عليه
الزوج بكل هدوئ :- باقول ايه مادام مابقاش فيها فطار الا حرقة الدم انا جاتنى فكرى كويسة
الزوجة :- خير؟
الزوج :- انت مؤخر صداقك كان كام؟
الزوجة :- 500 جنيه .. ليه ؟
الزوج :- اصلى كنت عايز اقولك روحى وانت طالق